第一次為周梓樂而感傷，係死訊公佈之時。第二次為周梓樂而感傷，欲哭而無淚，係睇到佢屋企人嘅信。而第三次為周梓樂而感傷，竟然睇睇吓新聞就淚流不止，就係出殯嘅今日。當想像痛苦如此輕易，人與人之間嘅情感如此互通無礙，有冇身體力行參與喪葬儀式以表達心意，已經係其次。
周梓樂爸爸寫，「孩子，責任完了，安息吧！我以你為榮。」而媽媽則寫，「仔呀，你好勇敢，媽媽也要流芳萬世。別流淚，死，並不可怕，天堂再見吧。」箇中蘊含之愛與信任，真係可以用深如海去形容而完全唔顯得濫情。爸爸理解梓樂，抗爭係為社會共同體嘅未來而付出，用責任定義梓樂，係代表佢完全明白肉體消亡但精神不死嘅意義。雖然只係大學生，並未成就任何世俗認同嘅顯赫偉業，但以你為榮一詞絕非過譽，因為心中擁有如此強大信念嘅後生仔，將來一定會有所作為，而家只係提早寫低，提前認證。
而媽媽，自然亦完全理解梓樂。稱呼一出，已經令我不忍直視，無法承受。選用勇敢兩字，反映媽媽心中清楚知道梓樂因何而死，而且認為佢已經超越一般人，成為勇者。兩人之間嘅相知，打破代溝，粉碎年齡差距，證明咗愛係可以突破所有難關，呢個世界上，根本就唔會有無法接受自己嘅屋企人，只要屋企人係真正嘅屋企人。一般情況，後人係理應因為前人種樹而得到樹蔭，但如今流芳萬世嘅變咗媽媽，白頭人送黑頭人之境況，更見淒涼。然而，正因為兩人之間感情深厚，靈魂相依，梓樂嘅肉身消亡已經唔足以構成任何恐懼，因為天堂之門，一早已經為呢個家庭而大方打開。
有啲人終其一生，都永遠無法成為他人生命之中最重要嘅人，成為共同體之中嘅VIP。梓樂生命雖然短暫，但佢已經成就解鎖，感受過生之意義，比消極犬儒咁樣苟活百年嘅類人生物過得更加開心，更加精彩。成長路上每一次嘅振作，同屋企人朋友每一日每一次嘅相處，都係梓樂人生嘅寶貴回憶，而呢一切都會成為喺往後幾十年支持住梓樂爸爸媽媽努力生存落去嘅所有支撐。我永遠無法知道梓樂嘅少年生活，更唔會知道結衣於佢而言魅力何在，但生命嘅重量，必將加疊於我有關民族前途嘅思考之上，至死方休。
終有一日，周梓樂之枉死會得到平反，而香港人世世代代，都會記得呢個家庭所帶畀成個民族嘅感動。我唔信神，唔信外力，但梓樂之生命，我相信上帝早已預備。手足請安息。
Search